Հայաստանում հնագույն տաճար են պեղել

Շիրակի մարզի Ջրաձորի ամրոցակիր բլրի գագաթին պեղումների ժամանակ հնէաբանները հայտնաբերել են տուֆաշեն քառանկյուն շինություն, որը կարող է ուրարտական շրջանի տաճար լինել։ Այն կառուցվել է ավելի քան 1800 մետր բարձրության վրա ուշ ուրարտական ժամանակաշրջանում, իսկ Միջնադարում այն օգտագործվել է որպես աղոթատեղի։

Գիտությունների ազգային ակադեմիայի Շիրակի հայագիտական հետազոտությունների կենտրոնի արշավախումբը Ջրաձորի ամրոցում պեղումները սկսել է 2016 թվականին։ Այն ժամանակ մասնագետները մաքրել էին հյուսիսային լանջի ստորին հատվածները և հայտնաբերել ուրարտական զենքի մասեր, ջարդված կավե տարաների մասեր և այլ նմուշներ։